தேர்ந்தெடுக்கப்பட்ட யுபிஐ வணிகப் பரிவர்த்தனைகளுக்கான வணிகர் தள்ளுபடிக் கட்டணத்தை தீபாவளிக்குப் பிறகு அமல்படுத்த இந்திய தேசிய பணப்பரிவர்த்தனைக் கழகம் முடிவு செய்துள்ளது. பண்டிகைக்கால விற்பனையைக் கருத்தில்கொண்டு இந்த நடவடிக்கை எடுக்கப்பட்டுள்ளது.
அக்டோபர் 15-ம் தேதி நடைமுறைக்கு வரவிருந்த புதிய கட்டண முறையை ஒத்திவைக்க, அக்டோபர் 13-ம் தேதி நடைபெற்ற யுபிஐ மற்றும் சேவைகள் வழிகாட்டுக் குழுக் கூட்டத்தில் முடிவு எடுக்கப்பட்டது. புதிய அமலாக்கத் தேதி தனியாக அறிவிக்கப்படும் என்று கழகம் தெரிவித்துள்ளது.
முன்மொழியப்பட்ட கட்டமைப்பின்படி, ரூ.2,000-க்கு மேற்பட்ட தகுதியுடைய தனிநபர் முதல் வணிகர் வரையிலான யுபிஐ பரிவர்த்தனைகளுக்கு 0.4 சதவீதக் கட்டணம் விதிக்கப்படும். ஒரு பரிவர்த்தனைக்கான அதிகபட்சக் கட்டணம் ரூ.300 ஆக இருக்கும். தனிநபர்களுக்கு இடையிலான பணப்பரிமாற்றங்களுக்கும் சிறு வணிகர்களுக்கான பணப் பரிவர்த்தனைகளுக்கும் கட்டணமில்லாத நடைமுறை தொடரும்.
இந்தக் கட்டண வருவாய், இணையப் பாதுகாப்புக் கட்டமைப்பு, செயற்கை நுண்ணறிவு அடிப்படையிலான மோசடி கண்டறிதல் உள்ளிட்ட பணிகளுக்குப் பயன்படுத்தப்பட உள்ளது. தீபாவளிக்குப் பிறகு அமல்படுத்தும்போதும் கட்டண விகிதம் மாறாது என தொழில்துறை வட்டாரம் தெரிவித்துள்ளது.
ஒத்திவைப்பை சில்லறை வணிகர்கள் வரவேற்றுள்ளனர். பண்டிகை காலத்தின் நடுவில் கட்டணத்தை அறிமுகப்படுத்துவது, ரசீது மற்றும் கணக்கியல் அமைப்புகளை மாற்றவும் ஊழியர்களுக்குப் பயிற்சி அளிக்கவும் கட்டாயப்படுத்தியிருக்கும் என்று இந்திய ஆடை உற்பத்தியாளர்கள் சங்கத் தலைவர் சந்தோஷ் கட்டாரியா தெரிவித்தார்.
கூடுதல் அவகாசம், குறிப்பாக அதிக மதிப்புள்ள பரிவர்த்தனைகளைக் கையாளும் வணிகர்கள் புதிய கட்டணங்களைப் புரிந்துகொண்டு, பணப்பரிவர்த்தனை நிறுவனங்களுடன் இணைந்து தங்கள் அமைப்புகளைத் தயார்படுத்த உதவும் என்று ஏர்பே நிறுவனர் குணால் ஜுன்ஜுன்வாலா கூறினார்.
புதிய தேதி நெருங்கும்போது வங்கிகளும் பணப் பரிவர்த்தனை சேவை வழங்குநர்களும் தெளிவான தகவல்களை வழங்குவது வணிகர்களும் வாடிக்கையாளர்களும் மாற்றத்தை நம்பிக்கையுடன் எதிர்கொள்ள உதவும் என்றும் அவர் மேலும் குறிப்பிட்டு உள்ளார்.
